Adeladius
Makwega-MARA
Mei
26, 2023 Mwanakwetu yu umbali mchache na kaburi la Mwalimu Julius Nyerere
aliyeliongoza Taifa la Tanzania kwa miaka 23 akiwa ni Rais wa Kwanza wa
Tanganyika huru na Jamhuri ya Muungano wa Tanzania. Mazingira ya eneo hilo ni
kijani kibichi, huku watu wote wanaofika hapo wakikaribishwa kwa heshima zote na
wahudumu wa eneo hilo vijana ambalo kwa kuwatazama hata wao kama walimuona
Mwalimu Nyerere basi kwa kipindi kifupi tu
tena cha utoto wao tu.
“Mwalimu
Julius Nyerere Mei 2, 1955 alikwenda
Umoja wa Mataifa katika hizo harakati za kuudai Uhuru wa Tanganyika, akiwa huko Marekami alitoa hotuba iliyowasilishwa na ikawa mwiba na
iliwakera mno wakoloni Waingereza ambao ndiyo walikuwa watawala wa Tanganyika. Mei
21, 1955 Mwalimu Nyerere aliwasili Tanganyika Uwanja wa Ndege wa Dar es Salaam na
aliposhuka tu alipokonywa kibali chake cha kusafiria na Serikali ya Kikoloni. Alitoka
hapo uwanjani kuelekea kazini kwake Pugu Sekondari, alipofika huku alikutana na
mwiba mwingine wa mkoloni, akaitwa na Mkuu wa
Shule ya Pugu akaambiwa achague moja kama kufanya siasa au kuendelea na
kazi ya kufundisha. Mwalimu akiwa mbele ya Mkuu wa Shule mzungu hakujibu kitu,
alikaa kimya huku akilini mwake akiwa na jibu la swali hilo la mkuu wake wa
kazi na wakala wa Kikoloni. Siku iliyofuata yaani Mei 22, 1955 aliandika barua
ya kuacha kazi na baadaye kurudi kijijini kwao hapa Butiama yeye na familia
yake, akawa anafanya kazi ya kujitolea kwa Wamisionari hapo hapo kijijini.”
Hayo yanaendelea kusimuliwa huku Mwanakwetu
kama baba, kama mzazi na kundi la watu kadhaa ambao walikuwa wakimsikiliza
msimuliaji huyo ambaye alitumia lugha ya kueleweka, kwa upole mkubwa mithili ya
mtawa wa Kanisa Katoliki aliyeopo katika mimbari ya kanisa siku ya dominika
maelezo yake yakisikitisha mno.
Eneo hilo yanaposimuliwa maelezo hayo lilionekana
miti kadhaa ya asili ambayo ilivumisha upepo mzuri sana na kuipamba ardhi hiyo na
majani yaliyokuwa mapana sana yaliyokuwa
yanaanguka kila sekunde kutoka mitini. sauti ya upepo wa miti hiyo ilisindikizwa
na sauti za ndege pili ya ndege Tausi waliokuwa wakilia katika makazi hayo.
“Kumbe
nao Tausi wanasauti mbaya hivyo?”
Alisema mtu mmoja kando ya Mwanakwetu, kumbuka
msimuliaji yu mbele huku akiwa amevalia
fulani nyeupe na suruali iliyopigwa pasi vizuri, viatu vyeusi akiendelea
kusimulia kwa uhodari mkubwa.
“Kazi
kubwa aliyokuwa akiifanya Mwaiimu Nyerere kwa Wamisionari hapa Butiama ilikuwa ni
kuwafundisha Kizanaki na Kikwaya Lugha za asiili za eneo hilo na wakati
mwingine alikuwa akifanya tafsiri ya masomo ya
misa ya siku iliyofuata ya Kanisa
Katoliki kutoka Kilatini kwenda Kizanaki au Kikwaya, yaweze kueleweka kwa
Wakristo wa eneo hilo.”
Msomaji wa Mwanakwetu kumbuka sasa Mwalimu
Nyerere hana kazi kibarua kimepotea yu nyumbani kwao Butiama, msimuliaji
anasimulia huku kila mmoja kimya kana kwamba amemwagiwa maji ya baridi japokuwa
jua kali linawaka hapa Butiama, mkoani Mara.
“Agosti 1955
Oscar Kambona alitumwa na wanasiasa wenzake wa TANU kumfuata Mwalimu Nyerere Butiama maana
wenzake walikuwa hawamsikii tena ndugu yao ambaye tayari alikuwa hana kazi na amepoteza
kibarua kutokana na harakati za siasa za
Tanganyika. Kambona alipofika kwa Mwalimu Nyerere alikabidhi nauli ya Mwalimu
Nyerere iliyotolewa na wenzake ili arudi Dar es Salaam kuendelea na siasa,
alipopewa pesa hiyo ya nauli na Kambona, Mwalimu alichukua pesa hiyo akampa nduguye
aliyefahamika kama Joseph Nyerere akimwabia anunue Ng’ombe. Joseph Nyerere
alinunua ng’ombe huyo na kumpeleka kwa Julius Nyerere. Maswali yakiwa je ng’ombe
hiyo ni ya kufunga kwa kuwa sasa Mwalimu Nyerere hana kazi au kunasherehe ya
ugeni wa mwanasiasa Oscar Kambona? Mwalimu Nyerere alitoa maagizo kuwa achijwe,
akaliwa na siku zikawa zinasonga naye Oscar Kambona hafahamu kinachoendelea, je
lini wanarudi na Mwalimu Nyerere Dar es Salaam kuendelea na siasa? Oscar Kambona
alikaa hapo akachoka, akaamua kwenda Kigoma, Bukoba na Mwanza na baadaye kupanda
treni kurudi Dar es Salaam.”
Msimuliaji huyu aliendelea kusimulia kila
mmoja akitega sikio,
“Mwaka 1957 Mwalimu Nyerere alipewa Ubunge kwa
kuteuliwa na Gavana, hapo ndipo akarudi katika siasa kwa nguvu zote akiteuliwa
kuiwakilisha Morogoro, Japokuwa hakukuwa
kwao.”
.
Kumbuka msomaji wangu hayo yanasimuliwa na
mtumishi katika Makumbusho ya Mwalimu Nyerere
hapa Butiama, akili na masikio ya
Mwanakwetu yakimsikiliza kwa umakini mkubwa kwa sababu nyingi, mojawapo ni kutokana na kutajwa mno kwa mwanasiasa Oscar Kambona ambaye walitafautiana
sana mwishoni wa miaka ya 1960 naye Kambona na kwenda Uingereza.
Swali ambao liliibuka ni juu ya mahusiano ya Mwalimu Nyerere kabla ya uhuru na miaka ile ya awali
hadi kukaribia Azimio la Arusha na Kambona yalikuwa ya
kidugu, kirafiki , kijamaa mno na ya kuaminiana.
Mahusiano hayo yaliingia shubiri na kuwa
mabaya, je kuna ushahidi wowote ule wa
kiserikali au wa kifamilia juu ya Mwalimu Nyerere ambaye sasani Mwenyeheri
ambayo ni hadhi kubwa kwa Kanisa
Katoliki kama aliwahi kukutana, kumpigia simu nduguye Oscar Kambona kusameheana tangu tafauti hizo kutokea hadi
kifo cha Mwalimu Nyerere mwaka 1999?
“Mwalimu
Nyerere na Oscar Kambona kwa ukweli kabisa walikuwa na utafauti wa kimitazamo
ya kisiasa tu baina yao, ikikumbukwa kuwa Kambona ndiye aliyekuwa Katibu Mkuu
wa Kwanza wa TANU kama waliwahi kukaa pamoja na kuzungumza baada ya kupishana
huku hilo halifahamiki.”
Majibu hayo yalitolewa.
Siku ya leo Mwanakweu anasema nini?
Mwanakwetu anaamini kuwa kama kulikuwa na utafauti
wa wa kimtazamo hilo si baya lakini utafauti wa kimtazamo je vita, uadui wa
viongozi wa milele? Je wanasiasa wetu wa sasa wa Tanzania wanajifunza nini
katika kisa hiki ya Mwalimu Nyerere(MKATOLIKI) na Oscar Kambona(PSYAIBATARIAN)?
Pengine wapo Watanzania ambao
wanalifahamu zaidi jambo hilo, kubwa utafauti wa kisiasa si uadui wa milele na
misamaha ni jambo la msingi.
Mwanakwetu upo? Nakutakia siku njema.
0717649257
Post a Comment