Adeladius Makwega-MWANZA
Novemba Mosi, 2023 Rais wa Ujerumani
Frank-Walter
Steinmeier aliomba msamaha kwa Tanganyika juu ya madhila
yaliyofanywa na taifa lake mwaka 1905-1907 wakati wa vita vya Maji Maji huku
ikikadiliwa kuwa watu kati ya laki mbili na tatu walifariki katika kadhia hiyo.
Mara baada ya tamko hilo la Rais wa Ujerumani akiwa katika
ardhi ya Tanzania, Mwanakwetu alijaribu kujiuliza maswali mengi,
“Je ni kweli Ujerumani inaomba radhi ?Je kwanini maombi hayo
ya radhi yanatamkwa sasa? Je vyombo vya Habari vya Ujerumani vimeipa kipao
mbele gani taarifa hiyo?.”
Mwanakwetu kwanza alitembelea ukurasa wa DW Kiswahili ambalo
ni Shirikla la Propaganda za taifa hilo duniani, hapa alikutana na picha moja
kubwa akionekana Rais huyu wa Ujerumani mbele ya Kaburi la mashujaa hao wa
Wangoni walionyongwa na Wajerumani wakati huo.
Rais huyo alionekana akifumbata mikono yake mbele ya kaburi
hilo kama akisali na mbele yake wanaonekana machifu wa Kingoni ambao ndugu zao
walinyongwa katika kadhia hiyo ya kusikitisha.
Mwanakwetu alipofuatilia zaidi matangazo ya mchana ya Redio
ya DW KISWAHILI, siku hiyo mwongozaji akiwa Sudi Mnette ambaye ni mzaliwa wa
Tanzania na huku habari hiyo ilisomwa na Amina Abubakari(Amina Mjahidi) ambaye
ni mtangazaji mwenye asili ya mwambao ya Kenya.Mwanakwetu alibaini kuwa habari
za siku hiyo za shirika hilo zilihusisha mataifa ya Kenya (Mfalme Charles
MauMau) na Tanzania(Rais wa Ujerumani MajiMaji).
Huku akijiuliza je mataifa haya ya Ulaya yana nini na MajiMaji
na MauMau ambapo wazee wetu walifariki dunia.
Mwanakwetu anaendeleau kufuatilia vyombo vya Habari vya
Ujerumani.
“DW ENGLISH walikuwa
na video ya dakika tano na sekunde moja, kazi hiyo ilitayarishwa na Katharina
Kroll ambaye ni raia wa Ujerumani, kwa hakika Katharina alielezea tukio hilo
kama lilivyokuwa pale Songea. Japokuwa picha ya utambulisho wa Video hii
mwanzoni hakuonesha Rais wa Ujerumani katika kaburi pale Songea, ambayo
ilipaswa kuwa picha ya utambulisho mwanzoni.Kwa hiyo kwa katharina Kikao cha machifu na rais wa UJermani kilikuwa na umuhimu kuliko
heshima kwa kaburi hilo.Japokuwa picha heshima ya Rais wa Ujerumani iliwekwa
ndani ya video hiyo.”
Mwanakwetu anafuatilia je hawa Wajerumani wanaomba msamaha
kweli? Maana waliofariki katika vita hivyo si Wangoni peke yao bali makabila
mengi ya Tanganyika. Kwani hata hawa Wangoni wanaotajwa kama Wangoni wao walikuwa
mabwana wa vita walioleana na makabila mengine mengi, iwe kwa kuwachukua mateka
au kwa hiari.
Msomaj wangu kwa bahati nzuri, wakati tukio hilo la kuomba
radhi linaendelea huko Songea, Mwanakwetu alikuwa jirani na mtu mmoja ambaye
yeye ana asili ya Songea na ni Mngoni kwa baba na mama yake.
Ndugu huyu alisema
maneno haya,
“Ni kweli Rais. Frank-Walter
Steinmeier ameomba msamaha, na mtu anapokuomba msamaha lazima
umsamahe. Yule anayekuja kuomba msamaha anaweza akawa kauliza, ‘je nikiwaomba
msamaha hawa jamaa watasamehe?’ Anaweza akajibiwa na wale anaowauliza, ‘Hawana
shida wape ujimbi(pombe) tu na posho kidogo watasame na mambo yataenda vizuri.’
Inawezekana maombi ya msamaha huo yana jambo. ”
Ndugu huyu akaongeza kuwa huyu anayekuja
kuomba msamaha, anakufahamu kuwa wewe utasamehe na atakuyarishia ujimbi na pesa.
“Rais huyo wa Ujerumani Frank-Walter Steinemeier
pamoja na kueleza fedheha iliyosababishwa na madhila hayo amesema Ujerumani iko
tayari kushirikiana na Tanzania kuelekea mchakato wa pamoja wa kuyaangalia
madhila ya kihistoria,huku akitilia mkazo kwamba kilichotokea ni historia ya
pamoja kati ya Ujerumani na Tanzania inayowahusisha wazee waliotangulia wa
pande zote mbili.
Ameahidi kuufikisha ujumbe nchini Ujerumani kwa
yaliyotokea ili watu wengi zaidi nchini Ujerumani wayafahamu. Kadhalika
aliwaahidi Watanzania kwamba atahakikisha kwamba Wajerumani watakuwa tayari
kuyatafuta majibu kwa pamoja na Watanzania ya maswali ambayo hayajapatiwa
ufumbuzi na ambayo yanawakosesha usingizi Watanzania.”
Ujerumani yawaomba radhi Watanzania kwa madhila ya Ukoloni – DW – 01.11.2023
Hayo yalikuwa maelezo ya DW KISWAHILI, hoja ni ileile Ujimbi na Pesa.
Hapo hapo Mwanakwetu akayakubali maelezo ya ndugu yake huyu Mngoni wa Songea.
Jambo la kusikitisha hata Watanzania
wasomi ambao walihojiwa na vyombo vya habari vya kimataifa Novemba Mosi , 2023
waliingia kuicheza ngoma hiyo ya Ujimbi na Pesa.
Kwa mfano,
Sudi Mnette wa DW KISWAHILI aliongea na Mtanzania aliyemtaja kama Mwanahistoria
ambaye alikubaliana na maombi hayo ya radhi, ambalo hilo Mwanakwetu anakubaliana
nalo na hata huyu Mngoni wa Songea anakubaliana nalo. Msomi huyu alisema mabaki
ya miili ya mashuja hayo yarudishwe na kuzikwa kwa heshima zote, hilo
Mwanakwetu anakubaliana nalo na hata huyu Mngoni wa Songea anakubaliana nalo.
Shida ilikuja katika swali la mwisho la Sudi Mnette,
“Unajua inapotokea suala
la radhi na mambo kama hayo inatajwa suala la fidia.”
Dkt Mohammeda Said akajibu,
“Kama umemdhulumu mtu lazima umlipe fidia .”
01.11.2023 Matangazo Ya Mchana – DW – 01.11.2023
Msomaji wangu hoja ni ileile ya Ujimbi n a Pesa.
Je Mwanakwetu anasema nini siku ya leo?
Mwanakwetu anasema kuwa ndugu zetu hawa mashujaa wa vita vya Maji Maji malipo yao siyo ujimbi na fedha, kama malipo yao yangalikuwa hayo wasingeweza kuingia katika kuhatarisha uhai wao.
“Hakuna mtu yoyote anayeweza kulipa gharama ya uhai kwa mtu aliyeupoteza.”
Shida ni moja kwa sasa anayeomba msamaha na hata anayesamehe hawakuwepo wakati tukio hilo linatokea ndiyo kusema kuomba msamaha ni kwepesi na hata kusamehe pia ni kwepesi.
Funzo kubwa hapa ni kuwa,
“Kila serikali zinapokuwa na mamlaka yake kuna vipindi zinaweza kuingia katika migogoro iwe ya Kisiasa na hata kiuchumi. Migogoro isipelekwe katika kupoteza uhai wa watu , maana hao wanaofanywa hivyo hawawezi kulipa uhai huo na uhai hauna mbadala wake.”
Mwanakwetu Upo?
Uhai Hauna Mbadala
Nakutakia siku Njema.
0717649257
Post a Comment